Sala de arqueoloxía	imprimir
A romanización

Estela romana de Dionysos e Ampelos. Vigo cidade

Vimos, ó longo do noso percorrido, diferentes monumentos funerarios que, polas súas dificultades de montaxe, se espallan por toda a sala. Constitúen a magnífica colección de estelas funerarias de época romana, unha das mellores da península, descuberta que deu lugar á creación desta sala e a sección arqueolóxica do museo.

Foron atopadas, as mellor conservadas, boca abaixo e xa sen significado, servindo de paso a un regato en época medieval. Polos seus epígrafes documéntase a existencia no Vigo romano dunha poboación procedente de Clunia (Burgos). Son de destacar os motivos en relevo, algunhas escenas, crecentes luares e rosetas, e arcadas. Deseños propios desta zona do noroeste da que son o seu máximo expoñente.

O comercio

Neste sector temos, tamén repartidas pola sala, diferentes formas de ánforas procedentes a maioría da costa portuguesa (traídas entre as súas redes polos pesqueiros de Bouzas); e, nas mesas centrais, moedas romanas de practicamente todos os emperadores. Son dous tipos de obxectos arqueolóxicos que nos falan da importancia do comercio nesta época.

A construcción

A vitrina seguinte mostra algúns elementos utilizados na construcción desta época; os máis frecuentes: tegula e ímbrice para o cubrimento de edificios, estos con marcas de alfar feitas coos dedos, e algunhas pegadas de animais cando aínda estaban frescas.

Busto do emperador romano Marco Aurelio. Legado Policarpo Sanz.

Destacan os tixolos con signos zodiacais procedentes dunha villa destruída en Teis, anacos de mosaico, pórfido e estuco.

Recipientes finos e comúns

Nas vitrinas de parede seguintes, obxectos procedentes de Lancia (León) e de castros galegos ilústrannos novos costumes: a cerámica fina ou de mesa, a de importación, algunha realizada en molde (sigillata); fragmentos de recipientes de vidro, un dado ou unha lámpada de.aceite ou lucerna. Entre a cerámica de uso común destacan as vasixas de almacenaxe e as xarras.

Transporte en barco

A última vitrina está practicamente dedicada ás ánforas, recipientes por excelencia para o transporte en barco. Por ista razón son frecuentes os restos aparecidos no fondo da ría, algúns procedentes de barcos afundidos como en Cabo de Mar, que testemuñan o tráfico marítimo da época nesta zona.