A falta de persoal técnico permanente nos departamentos do museo limitou o desenvolvemento destes ao esencial; aínda que, en 2005, a contratación de diversas asistencias técnicas e a convocatoria de bolsas, afectará positivamente á ordenación e catalogación das coleccións así como á súa valoración económica; á actualización dos seus sistemas de documentación (inventario e rexistro); e á ordenación do arquivo documental do museo.
Por outra banda o museo serve como contorno de formación de universitarios de distintas especialidades que contribúen ó mantemento das investigacións que poden abranguer distintos aspectos do museo: estudos de público; visitas; de obras; etc....
O museo ten concertados convenios neste sentido, a través do concello, coa Universidade de Santiago de Compostela e coa Universidade de Vigo, esta última mediante o laboratorio de arqueoloxía, dependente da Facultade de Humanidades, no campus de Ourense; e a escola superior de turismo "Welton" de Vigo.
As exposicións temporais tamén serviron de marco para o desenvolvemento de investigacións verbo de, por exemplo, o Legado Policarpo Sanz; a Reconquista; a vila de Bouzas; a arte sacra viguesa; etc... as cales motivaron tamén as súas correspondentes publicacións.
Outros departamentos municipais, como Patrimonio Histórico, desenvolveron traballos sobre materiais depositados actualmente no museo como a colección de útiles paleolíticos “Pedro Díaz”. Actualmente o Laboratorio de Arqueoloxía da Universidade de Vigo está a estudar determinados materiais relacionados co xacemento romano de Mirambell cara á configuración do seu futuro museo.
| 
imprimir